Hamn og handleri

Midt mellom historie, kvardagsliv og fjordlandskap ligg Eivindvik si hamn og handleri – ein stad der tradisjonane sit i veggane, og der nye møteplassar og moderne tenester no veks fram. Her møtest fastbuande, fritidsfolk og tilreisande i eit levande sentrum tett på sjøen.

Eivindvik har i generasjonar vore eit naturleg sentrum for folk frå øyane og bygdene i Gulen. Hit kom ein for å handle, ordne ærend og møte andre. Rundt år 1900 kom den første rutekaia på plass, opphavleg bygd for dampskipa til Fylkesbaatane – og Eivindvik vaks fram som eit viktig bindeledd mellom fjord og folk.

Staden husa både lekjar, lensmann, prest og fleire sentrale funksjonar, og vart eit livleg knutepunkt for rutebåttrafikken. På tidleg 1900‑tal tok familien Peder R. Sandal til å satse på handel, og la grunnlaget for Eivindvik som handelsstad gjennom fleire tiår.

I dag er det ikkje lenger lensmann og bank på kaia, men Eivindvik er framleis eit naturleg samlingspunkt for fastbuande, hyttefolk og tilreisande. Du finn både offentlege og private tenester i gåavstand frå kaia.

Varehandelen skjer framleis frå butikken nede ved sjøen, og frå 2026 er det Eivindvik Brygge Handleri AS som tek over drifta. Visjonen er å vidareutvikle møteplassen – gjere aktivitetane meir tilgjengelege for alle, styrke lokal identitet og tilby ei moderne, berekraftig form for varehandel i historiske omgjevnader ved fjorden.